Hai uns anos, a escritora Isabel Allende explicou que ela sempre empeza a escribir as súas novelas un 8 de xaneiro.

Primeiro, loxicamente, dedica tempo ás fases de documentación e esquematización da obra, pero poñerse a escribir, o que se di plasmar as primeiras palabras da primeira páxina, sempre o fai un 8 de xaneiro.

Pode ser, en parte, por superstición. Cun libro segues un determinado ritual e, se todo sae ben, iso acaba por converterse en rutina. E desde logo Isabel Allende ten algúns dos libros máis lidos do século XX e os premios máis importantes do mundo literario. Aínda que dubido que fose por escribir un 8 de xaneiro.

O máis probable é que esa decisión se deba, máis ben, a un exercicio de ordenamento mental. É unha forma consciente de dar por terminadas as festas e sentarse en serio a traballar na escrita.

Todos fixemos unha pausa durante estas datas do Nadal, así que o 8 de xaneiro é o día perfecto para dar por terminado ese descanso, desempoar as vellas rutinas e escribir. Este ano teño varios proxectos moi avanzados, así que veremos o que me depara o 2026.

E ti? Que vas escribir hoxe?

Máis datas sinaladas, supersticións e exercicios mentais nesta ligazón.